Medio ambiente | Sindicatos

A semana estivo marcada polos bloqueos con pacas de palla na Subdelegación do Goberno, a chegada de máis tractores ao centro e a esixencia dunha mesa de negociación con Xunta e Estado

As mobilizacións de gandeiros e agricultores en Ourense contra o acordo comercial entre a Unión Europea e o Mercosur viviron unha semana de máxima tensión e de escalada nas accións de protesta. O colectivo, mobilizado desde finais de decembro, intensificou a súa presenza no centro da cidade coincidindo co remate das festas e co retorno á actividade escolar e laboral.

Na noite do 6 de xaneiro, a xornada de Reis rematou cunha imaxe pouco habitual: os manifestantes deixaron bloqueadas as portas da Subdelegación do Goberno cun tractor e rollos de palla colocados durante a tarde, ao tempo que anunciaban a intención de apertar aínda máis ao día seguinte, coa previsión de superar as 130 máquinas nas rúas.

O mércores 7, a protesta deu un paso máis coa colocación de pacas de palla que impediron o acceso ás instalacións da Subdelegación, unha situación que levou a pechar ao público o edificio durante parte da xornada. Os mobilizados falaban de máis de 150 tractores dispoñibles e reclamaban interlocución directa con representantes do Goberno central, tras contactos con responsables locais e autonómicos.

Xa o xoves 8, tras unha reunión co delegado do Goberno en Galicia, os manifestantes retiraron o tractor e a palla que bloqueaban as entradas, pero decidiron en asemblea prolongar a concentración, como mínimo, ata o día 12. Nesa mesma xornada reclamaron unha mesa ‘a varias bandas’ (Subdelegación e Delegación do Goberno, consellerías implicadas e a Presidencia da Xunta) e advertiron de que, se non hai avances, valoran estender as accións a arterias principais, autovías e outras cidades.

No fondo do conflito, o sector insiste en que o pacto UE-Mercosur suporía competencia desleal pola entrada de produtos máis baratos e con esixencias diferentes ás europeas. Xunto a isto, vinculan as protestas a outras reclamacións sobre rendibilidade, cumprimento da Lei da Cadea Alimentaria e a carga burocrática da PAC, ademais doutras demandas en sanidade animal.