A veciñanza do Couto esixe unha solución ante a paralización das obras da Avenida de Portugal
A paralización das obras da Avenida de Portugal, no barrio do Couto, segue xerando tensión entre veciños e comerciantes, que demandan unha explicación tras o anuncio da empresa de poñer fin aos traballos que comezaron hai aproximadamente un ano.
Centos de veciños mobilizáronse o pasado luns pola tarde para protestar contra a decisión da empresa e recoller sinaturas para esixir que se rematen os traballos e se estableza un calendario de actuacións.
A empresa adxudicataria das obras anunciou publicamente o 9 de marzo a suspensión dos traballos debido á “imposibilidade de manter a viabilidade financeira do proxecto ante o incumprimento dos compromisos de pago por parte da Administración local”. Ademais de cuestións técnicas, a empresa responsabilizou ao Concello por adeudar as facturas correspondentes aos meses de novembro e decembro de 2025 e a xaneiro de 2026, argumentando que a suma destes impagos facía inviable o mantemento de subministracións, maquinaria e persoal.
Non obstante, o propio Concello notificou ao día seguinte á empresa que debía retomar as obras nun prazo de tres días. O alcalde denunciou que este anuncio constituíu un “acto insólito” ao facerse público a través dos medios de comunicación, lembrando que “o normal, e obrigatorio, sería comunicarlle ao Concello”, e engadiu que “como indica a lei, debe comunicarse cun mes de antelación”.
Desde o Goberno municipal explican que, legalmente, requírense catro meses de impagos para xustificar unha paralización, circunstancia que aínda non se deu, e consideran que “resulta inxustificado que unha empresa do sector paralice un proxecto de 5.200.000 euros por un atraso de 400.000 euros”.
Ante esta situación, o Concello deu orde á empresa de retomar os traballos, pero, lonxe de solucionarse o conflito, nos últimos días veciños e comerciantes do barrio viron como a empresa continuaba retirando a maquinaria.