A X Gala contra o Cancro de Ourense chega o 29 de novembro cun cartel de luxo
Andrés Suárez, Marta Doviro, a Real Banda de Gaitas da Deputación de Ourense, Castro Floxo, Dantzari e a cantante ourensá Daniela González Fontao subiranse ao escenario do Auditorio Municipal de Ourense
A sede da Asociación Española contra o Cancro (AECC) en Ourense acolleu esta mañá a presentación oficial da décima Gala contra o Cancro, un evento solidario que ao longo das súas nove edicións anteriores leva recadados máis de 50.000 euros para apoiar ás persoas afectadas pola enfermidade na provincia.O evento celebrarase o 29 de novembro ás 20:30 horas no Auditorio Municipal de Ourense.
David Rodríguez, organizador e presidente da Asociación Cultural As Canellas, destacou que esta edición contará “cun cartel de auténtico luxo” para celebrar o décimo aniversario da iniciativa. Pola súa banda, o presidente da AECC en Ourense, Germán Rodríguez-Saá, subliñou a importancia de continuar visibilizando a realidade do cancro e de manter o apoio aos programas que a asociación desenvolve diariamente.
A gala reunirá no escenario artistas como Andrés Suárez, Marta Doviro, a Real Banda de Gaitas da Deputación de Ourense, Castro Floxo, Dantzari e a cantante ourensá Daniela González Fontao.