Axenda

O encontro, que pretende poñer en valor o rico legado da curtición de coiro na vila, terá lugar do 26 ao 28 de setembro

Presentación das XII Xornadas dos Oficios do Coiro de Allariz

A tradición curtideira volverá ser protagonista en Allariz coa celebración da XII edición das Xornadas dos Oficios do Coiro, que se desenvolverán entre o 26 e o 28 de setembro. O encontro busca poñer en valor o legado histórico e artesanal ligado á curtición, unha actividade que marcou durante séculos a vida económica e social da vila.

Durante tres días, diferentes espazos como A Fábrica, A Paneira e o Museo do Coiro acollerán un amplo programa de actividades. Entre elas destacan obradoiros de cueroflexia, zocos artesanais, soguería, restauración e creación artística con po de coiro. Tamén están previstas conferencias a cargo de especialistas nacionais e internacionais, como profesionais de Guimarães e do Museu Municipal de Alcanena, ademais de exposicións artísticas, roteiros pola memoria dos curtidores e un mercado de ferramentas e produtos para o sector.

A iniciativa pretende ser un punto de encontro entre artesáns, investigadores, profesionais e público xeral, fomentando o intercambio de coñecementos e experiencias. Ademais, supón unha aposta pola recuperación da memoria dun oficio que deixou pegada na paisaxe urbana do río Arnoia e que continúa a ter presenza na identidade cultural de Allariz.

Coa celebración destas xornadas, o Concello reafirma o seu compromiso coa posta en valor do patrimonio artesanal e coa promoción da tradición do coiro como parte esencial da historia viva da vila.