A Xunta abre en Ourense unha oferta pública para mercar locais e convertelos en vivendas públicas de alugueiro
A Xunta de Galicia puxo en marcha en Ourense unha Oferta Pública de Adquisición de locais co obxectivo de transformalos en vivendas de promoción pública en réxime de alugueiro. A medida, publicada no Diario Oficial de Galicia, conta cun investimento de 2 millóns de euros e preséntase como unha iniciativa piloto para incrementar o parque público residencial na cidade.
A conselleira de Vivenda e Planificación de Infraestruturas, María Martínez Allegue, explicou que o plan busca un dobre efecto: crear novas vivendas protexidas e, ao tempo, ofrecerlles unha saída a propietarios de locais en desuso que actualmente non lles xeran rendemento.
O prazo para presentar ofertas abrirá mañá e permanecerá activo ata o 1 de maio. Os locais deberán estar situados na trama urbana de Ourense, en baixos ou entreplantas de edificios de uso residencial, ademais de atoparse en bo estado de conservación e libres de cargas. Cada proposta terá que permitir a creación, como mínimo, dunha vivenda que cumpra as condicións de edificación e habitabilidade; as ofertas poderán incluír tamén unha praza de garaxe ou un rocho por cada vivenda resultante.
No proceso, o Instituto Galego da Vivenda e Solo (IGVS) realizará unha taxación e seleccionará os locais que mellor encaixen, formulando unha oferta económica tomando como referencia a contía máis baixa entre o prezo proposto polo propietario, o valor da taxación ou o importe resultante dos prezos recollidos na convocatoria. Ademais, a Xunta asumirá os gastos de honorarios de profesionais necesarios para a documentación técnica ou trámites administrativos para participar, ata un máximo de 1.500 euros.
A Xunta enmarca esta actuación nun conxunto de medidas para facilitar o acceso á vivenda e lembra outras actuacións en marcha na cidade, como a construción de 64 vivendas públicas en Cambedo de Raia e o avance no desenvolvemento do ámbito do Escorial-Vinteún para habilitar solo residencial coa previsión de arredor de 1.600 novas vivendas promovidas por distintos axentes.