A Xunta restablece o servizo sanitario en todos os centros de saúde de Ourense tras os incendios
A Xunta de Galicia recuperará desde este mércores a asistencia sanitaria con normalidade en todos os centros de saúde da provincia de Ourense, tras despregar catorce antenas satélite Starlink e máis de 80 quilómetros de fibra óptica para garantir as comunicacións.
O restablecemento chega despois dun esforzo coordinado “sen precedentes”, que permitiu manter a atención médica durante os días nos que os incendios forestais afectaron a rede eléctrica e as infraestruturas de comunicación. Durante o luns e o martes, a Xunta reorganizou a asistencia concentrando os servizos médicos nos centros principais e asegurando a presenza de enfermaría en todos os centros de saúde, de maneira que toda a poboación recibiu atención sen complicacións.
Para manter informados aos cidadáns, enviáronse máis de 35.000 mensaxes SMS explicando os cambios na atención sanitaria e reducindo desprazamentos innecesarios.
Entre as actuacións técnicas, instaláronse antenas satélite nos hospitais de Valdeorras e Verín e nos centros de saúde de Trives, Viana do Bolo, A Rúa, O Barco, Vilardevós, A Mezquita, Ribadavia, A Veiga, Laza, Larouco e Manzaneda. Ademais, un operativo de 57 persoas de Telefónica despregou fibra óptica e restaurou as centrais de 5G afectadas polos incendios, mentres que catro unidades móbiles reforzaban a cobertura de telefonía e catro grupos electróxenos aseguraban o subministro eléctrico das instalacións sanitarias.
Grazas a estas medidas, explican, garanteuse o funcionamento de hospitais comarcais e centros de saúde en todas as cabeceiras de comarca, incluíndo os puntos de atención continuada, permitindo o acceso a servizos como historia clínica electrónica e receita electrónica.
A Consellería de Sanidade destacou o traballo do persoal do Sergas, dos técnicos de mantemento e comunicacións, dos equipos loxísticos e profesionais sanitarios, así como a colaboración de empresas de telecomunicacións, protección civil e corpos de seguridade, que fixeron posible manter a asistencia sanitaria mesmo nas condicións máis difíciles.