Aberto o prazo para solicitar as axudas para libros e comedores escolares nos centros educativos de Ourense
O Concello de Ourense abre hoxe, mércores, día 23 de abril, o prazo para que as familias interesadas poidan solicitar as axudas para a adquisición de libros e material escolar e de comedor escolar correspondentes ao curso 2025/2026, que concederá a Concellería de Asuntos Sociais. O prazo estará aberto até o día 14 de maio, incluído, e as solicitudes poderanse entregar de forma presencial ou telemática.
As axudas están dirixidas ás unidades familiares de convivencia con menores de idade escolarizados en centros públicos ou concertados da cidade (cuxa listaxe aparece no anexo I da convocatoria), que estean empadroadas no termo municipal de Ourense cunha antelación mínima de 3 meses, e cuxa capacidade económica anual non exceda de 4.000 euros da renda per cápita da unidade de convivencia.
A convocatoria ten un orzamento total de 294.250 euros, dos que 25.000 euros destinaranse a axudas para libros de texto e material escolar e 269.250 euros a comedores escolares.
As axudas para libros e material escolar están dirixidas a alumnado matriculado en 4º, 5º ou 6º curso de Educación Infantil, e serán de 110 euros por neno ou nena. As axudas para comedor están dirixidas a escolares matriculados en Educación Infantil, Primaria ou Secundaria Obrigatoria que teñan praza de comedor no centro no momento da concesión da axuda, que será de ata 90 euros mensuais por persoa.