Acordo unánime no Concello de Ourense para pedir á Xunta que autorice o baño na zona do Muíño

Os catro grupos con representación no Concello apelan ao diálogo coa Xunta para que esta contorna poida continuar á disposición de veciñanza

Termas do Muíño, imaxe de Amigos das Termas

O Concello de Ourense recibiu unha comunicación da Xunta de Galicia que o require a prohibir o baño de xeito permanente ou recomendar á xente que non se bañe nas pozas do Muíño da Veiga. Porén, discrepan desta decisión e dirixirase á Xunta de Galicia para buscar unha solución que permita que este espazo poida seguir sendo utilizado polas moitísimas persoas, residentes e visitantes da cidade, que fan uso del.

Así o acordaron os representantes de todos os grupos municipais, nunha xunta de portavoces convocada polo alcalde de Ourense, Gonzalo Pérez Jácome, tras recibir unha comunicación na que desde a Consellería de Sanidade se lle indica ao Concello que as pozas do Muíño non reúnen os requisitos para seren autorizadas como zona de baño a causa das características de funcionamento e da orixe da auga dos seus vasos.

Os catro grupos políticos con representación no Concello confían que a través do diálogo institucional coa Xunta se poida atopar unha solución, que se valore a excepcionalidade deste espazo termal e as súas singularidades, e esta contorna poida continuar á disposición de veciñanza.