AJE Ourense recoñece o esforzo dos mozos emprendedores ourensáns
A Asociación de Xóvenes Empresarios, AJE Ourense, entregou este venres pola noite os seus premios nunha gala que recoñeceu o esforzo emprendedor, a innovación e a capacidade dos mozos empresarios da provincia. Estes galardóns distinguen proxectos que contribúen á xeración de emprego e ao fortalecemento do tecido empresarial ourensán.
Ao acto de entrega acudiu o presidente da Deputación de Ourense, Luis Menor, quen subliñou que a institución provincial colabora con AJE Ourense con quen “compartimos liñas de traballo comúns” para apoiarlles nesta labor de fomento do emprendemento e a creación de emprego na provincia, así como polo seu papel como entidade que vela polos intereses das empresas xestionadas polos mozos ourensáns.
Menor lembrou que o Goberno provincial puxo en marcha programas como EmprendOU en Feminino, para axudar a mulleres menores de 30 anos a crear empresas no medio rural, ou AcelerOU, orientado a apoiar a pemes, autónomos e emprendedores na transformación dixital e modernización dos seus negocios. No seu discurso, tamén destacou “a importancia de escoitar e servir ao sector privado para acertar coas políticas públicas”, e agradeceu ao empresariado “o seu compromiso co territorio ao promover as súas ideas de negocio en Ourense, contribuíndo así a mantelo vivo e convertelo nun referente para numerosos sectores produtivos”.
Pola súa banda, o conselleiro de Emprego, Comercio e Emigración, José González, destacou durante a súa intervención, “o dinamismo da mocidade emprendedora ourensá e o compromiso da Xunta con seguir impulsando novas oportunidades profesionais para a mocidade galega, subliñando a importancia de potenciar e reter talento, tanto por conta propia como allea, como factor estratéxico para o desenvolvemento do tecido socioeconómico de Galicia”.
O conselleiro puxo en valor o papel de AJE Ourense “pola súa contribución ao fomento da cultura emprendedora e da vocación empresarial na provincia, unha prioridade compartida co Goberno galego”. Reafirmou a aposta da Xunta por un emprendemento ligado ao territorio, destacando a Rede de Polos de emprendemento e apoio ao emprego, que atendeu máis de 900 proxectos en Ourense e facilitou a creación de preto de 110 negocios. Tamén mencionou a implicación do coliving de Sende, en Lobeira, dentro do proxecto Fixar, orientado a atraer nómades dixitais ao rural galego.
Así mesmo, incidiu en que “o compromiso do Executivo autonómico co impulso das oportunidades profesionais da mocidade é absoluto”, aludindo aos últimos datos de emprego que reflicten que Galicia acadou en setembro a cifra de paro máis baixa entre menores de 30 anos desde que existen estatísticas. En Ourense, subliñou, o descenso interanual situouse no -5,38 %, con 109.182 afiliacións, “a cifra máis alta neste mes desde o ano 2009”.
O conselleiro tamén reiterou o compromiso co colectivo autónomo, lembrando que entre 2020 e 2024 os profesionais ourensáns recibiron máis de 20 millóns de euros en axudas específicas. Concluíu subliñando que “a colaboración público-privada con entidades como AJE Galicia e AJE Ourense resulta esencial para consolidar o desenvolvemento empresarial”, e defendeu que a Xunta quere “actuar como unha administración facilitadora, reducindo trabas burocráticas e acompañando a autónomos e pemes nos desafíos que afrontan nun contexto crecente de esixencias, garantindo que a remuda xeracional se converta nunha oportunidade real para o futuro do tecido produtivo galego”.