ALCER Ourense alcanza o seu maior número de socios en máis de catro décadas
A asociación ALCER Ourense pechou 2025 con 39 novas persoas asociadas, a cifra máis alta rexistrada desde os primeiros anos de actividade da entidade. A organización, que iniciou a súa labor na provincia en 1980 con sesenta membros, conta actualmente con 175 persoas inscritas en algún dos seus servizos.
O incremento rexistrado en 2025 só iguala ao aumento dos primeiros anos de actividade e reflicte, segundo a asociación, o impacto positivo de programas como o grupo de apoio “Da túa man” e o programa de acompañamento nutricional, que se iniciaron en 2022 e 2021, respectivamente. No seu primeiro ano, estes programas sumaron catorce novas altas, e no segundo, 22.
O equipo técnico provincial, composto pola nutricionista Uxía G. Tumbeiro e polas traballadoras sociais Carmen Dorado e Ana María Salgado, mantén a atención e asistencia directa ás persoas con patoloxías renais. Os responsables destacan a importancia de adaptar os seus servizos a distintos formatos e dinámicas para promover a mellora da calidade de vida, a integración social, a prevención e o coidado personalizado.
“A prioridade vixente é a promoción de hábitos saudables e de prevención na poboación xeral, así como a observación e coidado individualizado dos nosos usuarios”, sinalan desde a asociación, que atribúe ao reforzo destes programas gran parte do crecemento da base social en 2025.