Axenda

A obra, escrita por Luis de Guadalupe Martínez, destaca as reflexións do ourensán sobre os riscos do autoritarismo e a carreira armamentista

O Salón de Plenos do Concello de Allariz será escenario o vindeiro 29 de agosto ás 19:30 horas da presentación do libro “Modesto Seara e a súa preocupación pola catástrofe mundial”. O volume está asinado por Luis de Guadalupe Martínez, notario e ex alcalde de Huajuapan de León (Oaxaca, México), quen tamén desenvolveu ao longo da súa traxectoria profesional labores como xuíz, deputado e docente universitario.

O autor recolle neste traballo as reflexións de Modesto Seara, natural de Allariz e figura esencial na posta en marcha das universidades da Mixteca e do Mar en Oaxaca. O texto pon o foco na súa visión crítica sobre os perigos que representan os réximes autoritarios e o avance imparable da carreira armamentista, advertencias que o pensador ourensán deixou como legado intelectual.

A obra, ademais, serve de ponte entre as dúas vilas que marcaron a vida de Seara: Huajuapan de León e Allariz, unidas por unha relación de afecto e recoñecemento mutuo que se mantén viva a través da cultura e a memoria compartida.