Allariz aposta pola mellora da xestión da biomasa con novos equipamentos
O Concello de Allariz incorpora novos equipos destinados a mellorar a xestión da biomasa e dos residuos orgánicos grazas ao Programa de Valorización da Biomasa e dos Residuos Orgánicos, unha iniciativa municipal que aposta pola economía circular e pola redución do impacto ambiental.
Grazas a unha axuda do Fondo de Compensación Ambiental da Xunta de Galicia, o Concello adquiriu maquinaria e ferramentas de última xeración que facilitarán o traballo de mantemento das zonas verdes e das áreas de compostaxe. Entre o novo material inclúese un pequeno vehículo eléctrico de carga e un conxunto de ferramentas profesionais con batería, deseñadas para reducir o ruído e as emisións contaminantes durante as tarefas de limpeza e rozado.
A alcaldesa de Allariz, Cristina Cid, e o concelleiro de Medio Ambiente, Bernardo Varela, asistiron á entrega do novo equipamento, que permitirá aumentar a eficiencia na recollida e tratamento dos restos vexetais. Ambos destacaron que este investimento contribúe a reforzar o compromiso do municipio coa xestión responsable dos recursos naturais e coa prevención dos incendios forestais.
Desde o Goberno municipal subliñan que estas novas adquisicións supoñen un paso máis na súa estratexia de sostibilidade, afianzando un modelo de xestión sustentable orientado á reutilización dos residuos orgánicos, á redución do consumo de combustibles fósiles e ao coidado do entorno natural.