Allariz converterase nun escaparate da creatividade co Mercado de Artesanía “Arte de Man”
O vindeiro 7 de setembro, o corazón histórico de Allariz encherase de cor e creatividade coa celebración dunha nova edición do Mercado de Artesanía “Arte de Man”. A cita, xa consolidada no calendario cultural, desenvolverase na Zona de Santo Estevo entre as 11:00 e as 20:00 horas, convertendo as rúas da vila nun auténtico espazo de encontro co talento feito a man.
A feira contará cun amplo abano de participantes que representan a diversidade e a excelencia da artesanía galega. Entre eles estarán Mamá Sara (A Marinhenta), Marta Cui (cerámica artesanal), Xogo de Fíos, Enxógate, Imprime 3D, Estudo Aldea, Olería do Batán, Mor Talla, Magari Clay, Museo do Coiro, A.N.D.R.E.A., Moi de Flores, Luis Pachón, Artesanía Nómada, Paulinha D´Arzoa, Coco y Lobo, Paselopase, Merino Coqueta e Rosa Ana Soto.
Ademais da exposición e venda de pezas únicas, o evento incluirá propostas abertas ao público. Ás 12:00 horas, Moi de Flores impartirá un obradoiro de creación con flores secas, dirixido a todas as idades a partir de 6 anos, de carácter gratuíto e con prazas limitadas por orde de chegada. Xa pola tarde, entre as 17:00 e as 19:00 horas, Pirata Sen Parche poñerá a nota musical cunha animación festiva que acompañará a xornada.
Na presentación do programa, a alcaldesa de Allariz, Cristina Cid, e a concelleira de Promoción Económica, María López, destacaron a importancia de apoiar a artesanía como parte esencial do patrimonio cultural e económico local. “Queremos convidar a veciñanza e visitantes a descubrir o talento creativo que temos aquí e a seguir reforzando a identidade artesanal da vila”, subliñaron.
“Arte de Man” preséntase como unha ocasión única para coñecer produtos singulares, apoiar o comercio de proximidade e gozar dunha xornada de convivencia arredor da arte, a música e a tradición.