Cultura

Unha proposta cultural de gran formato que transforma o espazo urbano nun percorrido aberto pola vida desta figura

As rúas do centro histórico de Allariz acollen desde esta semana a exposición “Castelao: Sempre en Galiza”, unha proposta cultural de gran formato que transforma o espazo urbano nun percorrido aberto pola vida, obra e pensamento dunha das figuras máis emblemáticas do galeguismo: Alfonso Daniel Rodríguez Castelao. A iniciativa enmárcase na conmemoración do 75 aniversario do seu falecemento no exilio e pretende achegar o seu legado a toda a cidadanía.

A mostra, promovida polo Concello de Allariz, en colaboración con Nós Diario, está composta por 23 lonas que se distribúen por diferentes puntos do casco antigo. Cada unha delas ofrece contidos visuais e textuais que exploran as múltiples facetas de Castelao: como político, artista, pensador e defensor incansable dunha Galiza con voz propia.

O acto de inauguración celebrouse este mércores e contou coas intervencións do concelleiro de Cultura, Alberto Conde, do director de Nós Diario, Alberte Mera, e da alcaldesa de Allariz, Cristina Cid. Mera destacou o valor da exposición como ferramenta de divulgación e animou a outras institucións a sumarse ao compromiso co patrimonio cultural galego.

A alcaldesa subliñou o compromiso do Concello coa memoria de Castelao e a vontade de manter vivo o seu legado máis alá do ano 2025, destacando que esta mostra permite que cada espazo e cada paseo por Allariz se impregne coa obra e o pensamento do autor. Tamén apuntou que se trata dunha oportunidade para lembralo, reivindicalo e garantir que a súa figura teña presenza nas escolas e nos espazos públicos.

A mostra estrutúrase en tres grandes bloques temáticos:

• A súa acción política e social, dende a loita contra o caciquismo até o seu exilio en Bos Aires.
• A súa produción artística e literaria, como debuxante, narrador e dramaturgo.
• O seu pensamento político, centrado na obra Sempre en Galiza e na defensa da identidade nacional galega.

Os contidos foron elaborados por recoñecidas figuras da cultura e do pensamento galego como Xosé Luís Axeitos, María Victoria Carballo-Calero, Uxío Breogán Diéguez, Tareixa Navaza ou Miguel Anxo Seixas, entre outras.

A exposición poderá visitarse libremente nos espazos expositivos do centro histórico de Allariz até finais de 2025, ofrecendo unha oportunidade única para coñecer máis de preto a vida e o legado dun dos grandes referentes da historia de Galicia.