Allariz organiza un obradoiro sobre consetimento para crianzas
Allariz acollerá o próximo xoves, 5 de marzo, o obradoiro práctico “O meu corpo, os meus límites”, destinado a familias con nenos e nenas de 6 a 9 anos. A actividade, que se celebrará no segundo andar do Fogar dos Maiores en horario de 17:00 a 18:30 horas, pretende ensinar ás crianzas a coñecer os seus propios límites e a respectar os dos demais, promovendo o consentimento e a autonomía de xeito positivo.
Segundo os organizadores, “é fundamental que as nosas crianzas aprendan a coñecer os seus límites e a respectar os dos demais”. O obradoiro combina contidos prácticos e dinámicas participativas para favorecer a comprensión destes conceptos de forma lúdica e segura.
As persoas interesadas deben inscribirse antes do 4 de marzo, chamando aos teléfonos 988 554 059 ou 683 614 691, para garantir a súa praza.