Ana María del Carmen Blanco Arce toma posesión como nova presidenta da Audiencia Provincial de Ourense
Ana María del Carmen Blanco Arce tomou posesión esta mañá como nova presidenta da Audiencia Provincial de Ourense. A maxistrada é a primeira muller en presidir o alto órgano xudicial provincial, o que supón, segundo Blanco, “un fito no camiño cara á igualdade na carreira xudicial”.
A maxistrada ingresou na carreira xudicial en 1987, sendo o seu primeiro destino o Xulgado de Primeira Instancia e Instrución do Carballiño. En 1989 exerceu como titular do Xulgado do Penal número 1 de Ourense e, desde 2004, exerce as súas funcións como maxistrada da Audiencia Provincial de Ourense, sendo tamén a presidenta da sección segunda (penal) do alto órgano xudicial provincial.
O subdelegado do Goberno en Ourense, Eladio Santos, asistiu ao acto de toma de posesión onde celebrou que por primeira vez unha muller ocupe o cargo de presidenta da Audiencia Provincial, “un paso máis na loita pola igualdade en toda a sociedade”.