As baixas temperaturas fan remitir os incendios nas provincia de Lugo en Ourense
Os veciños de Quiroga e A Pobra do Brollón respiran con alivio grazas ao descenso das temperaturas, que conter o avance das lapas no segundo foco que afecta ao municipio quirogués nesta vaga de incendios.
Desde o pasado luns mobilizáronse 56 brigadas, 43 motobombas, 5 palas, 8 helicópteros e 13 avións, ademais de numerosos veciños e efectivos da UME. O incendio, iniciado en Abrence (A Pobra do Brollón), acabou afectando principalmente a Quiroga e obrigou a declarar a Situación 2 pola proximidade a varios núcleos, que finalmente quedaron a salvo, polo que hoxe foi desactivada.
Na tarde de onte, o lume dirixiuse cara á Pobra do Brollón pola zona de Augasmestas e achegouse a Covas, aínda que sen chegar a poñela en perigo. O concello confirmou que as viñas do municipio non sufriron danos. Tamén, as lapas lograron saltar o Sil ata Ribas de Sil, pero apenas ardeu antes de ser apagado por completo.
Ao longo da mañá de hoxe todos os frentes quedaron sen lapas, á espera da chegada da choiva que, aínda que escasa, “axudará a seguir controlando a situación”, segundo explicou Luis Manuel Arias, concelleiro de Medio Ambiente. A falta de confirmación oficial, estímase que a superficie afectada rolda as 900 hectáreas.
O tráfico permanece restablecido en todas as estradas, aínda que segue interrompida a circulación ferroviaria entre San Clodio-Quiroga e A Pobra do Brollón.
Tamén se conseguiu apagar o rebrote rexistrado en Outeiro, preto do límite con Folgoso do Courel, que foi de novo controlado. Ese lume estaba vinculado co de Larouco (Ourense), actualmente estabilizado.
Pola súa banda, o incendio da Fonsagrada, iniciado este martes en San Pedro de Río, está xa perimetrado e sen chama tras queimar unhas 40 hectáreas, sen chegar a pór en risco ningunha poboación. Atópase xa na categoría de estabilizado, aínda que, segundo confirmou o alcalde Carlos López, mantense un retén de vixilancia.
En Carballedo, na parroquia da Cova, continúa controlado desde o domingo o incendio que comezou o xoves e que arrasou 100 hectáreas.
OURENSE
En canto á provincia de Ourense, seguen activos dous incendios de consideración. O máis grave é o de Carballeda de Valdeorras, na parroquia de Casaio, que comezou o luns 18 e entrou en Galicia desde Castela e León, arrasando xa unhas 5.000 hectáreas.
Tamén continúa activo o lume de Avión, na parroquia de Nieva, iniciado na tarde do pasado domingo e que afecta, segundo as últimas estimacións, a unhas 250 hectáreas.
Por outra banda, permanecen estabilizados os incendios de Chandrexa de Queixa e Vilariño (19.000 hectáreas); o de Larouco, na parroquia de Seadur (30.000 hectáreas); o de Oímbra e Xinzo de Limia (17.000 hectáreas); o da Mezquita, na parroquia de A Esculqueira (10.000 hectáreas); e o de Carballeda de Avia e Beade (4.000 hectáreas).
Así mesmo, atópanse xa controlados os lumes de Maceda (3.500 hectáreas); Montederramo, na parroquia de Paredes (120 hectáreas); e o de Vilardevós, na parroquia de Vilar de Cervos (900 hectáreas).