As rutas culturais da UVigo dan comezo aos actos polo 50 aniversario do xacemento de Aquis Querquennis
Este ano cúmprense 50 anos do descubrimento do xacemento romano de Aquis Querquennis, e as actividades conmemorativas deste aniversario arrancarán este sábado, 22 de marzo, coa celebración dunha das rutas culturais da Universidade de Vigo neste enclave. Coma en cada andaina, a inscrición está aberta tanto á comunidade universitaria como ao público en xeral.
A oitava andaina do programa de rutas culturais da UVigo, organizada pola Área de Benestar, Saúde e Deporte, levará ás persoas participantes a "un dos destinos máis visitados do Parque Natural Serra do Xurés" e "o campamento militar romano máis colosal de todo o noroeste da península ibérica, Aquis Querquennis". O percorrido, que ten unha distancia de 18 quilómetros e unha dificultade media, permitirá aos inscritos tamén coñecer o trazado do Camiño de San Rosendo, a igrexa de Santa Comba de Bande e gozar das fermosas panorámicas do parque natural transfronteirizo.
Grazas á colaboración da Fundación Aquae Querquennae, as persoas participantes poderán coñecer de primeira man "este magnífico monumento, a súa historia e relevancia". Desde a organización lembran que Aquis Querquennis é o nome orixinal dun campamento militar romano establecido hai dous mil anos no lugar para a construción da coñecida como Vía Nova, unha calzada que conectaba Braga con Astorga. O xacemento está declarado Ben de Interese Cultural. Segundo explican desde a organización, será "unha ruta para dar a benvida á primavera, gozando da natureza e o patrimonio a partes iguais".
A inscrición en cada ruta cultural, que se realiza a través do Campus Activo da UVigo, está aberta exclusivamente para a comunidade universitaria ata o luns anterior a cada andaina. No caso de quedar prazas libres, os martes, mércores e xoves previos a cada ruta permitirase a inscrición de calquera persoa interesada. O prezo varía segundo o colectivo de pertenza en relación coa Universidade de Vigo, pero está aberta á participación de persoas alleas á universidade. Cada ruta realizada recoñecerase con 7,5 horas ECTS por día de duración. Hai autobuses dispoñibles para trasladar ás persoas participantes desde os tres campus da UVigo. Desde a organización animan á participación a todas as persoas interesadas, subliñando non só a oportunidade de coñecer Galicia e o seu contorno, senón tamén o "bo ambiente" destas rutas, que fai que todas as persoas se sintan moi cómodas.
Tras esta ruta, a penúltima andaina universitaria, que terá lugar o 5 de abril, desenvolverase nas Fragas do Eume, o "bosque atlántico mellor conservado de Europa", e no Mosteiro de Caaveiro. Finalmente, para pechar a programación de rutas culturais do curso 2024/2025, a UVigo propón unha nova etapa do Camiño dos Faros, concretamente a que vai de Arou a Cabo Vilán, en Camariñas, o 26 de abril.