Aumentan as hectáreas queimadas na provincia de Lugo e seguen sen controlarse dous lumes de Ourense
Galicia continúa a loitar contra catro incendios forestais que seguen activos, dous deles na provincia de Ourense e outros dous na de Lugo. O lume máis grave é o de Carballeda de Valdeorras, na parroquia de Casaio, onde xa foron arrasadas 5.000 hectáreas e que entrou en Galicia desde Castela e León. Para a súa extinción mobilizáronse de xeito acumulado 2 técnicos, 25 axentes, 45 brigadas, 33 motobombas, 3 pas, 5 helicópteros e 4 avións.
Segundo os últimos datos facilitados pola Consellería do Medio Rural, a superficie queimada no incendio da Pobra do Brollón, na parroquia de Abrence, que afectou principalmente a Quiroga, xa supera as 900 hectáreas. Neste punto mantense decretada a Situación 2 pola proximidade das lapas a núcleos de poboación.
Na provincia de Lugo tamén segue sen control o incendio da Fonsagrada, na parroquia de San Pedro de Río, cunha superficie afectada de arredor de 40 hectáreas.
En Ourense, ademais do lume de Carballeda de Valdeorras,continúa activo o incendio de Avión, na parroquia de Nieva, con 250 hectáreas calcinadas segundo as últimas estimacións.
Xunto a estes catro lumes, Medio Rural informou tamén da situación doutros focos. Mantéñense estabilizados en Ourense os incendios de Chandrexa de Queixa e Vilariño, que suman 19.000 hectáreas; o de Larouco, na parroquia de Seadur, con 30.000 hectáreas; o de Oímbra e Xinzo de Limia, con 17.000; o da Mezquita, na parroquia da Esculqueira, con 10.000; e o de Carballeda de Avia e Beade, con 4.000 hectáreas.
Polo seu lado, están xa controlados os lumes de Maceda, con 3.500 hectáreas afectadas; Montederramo, na parroquia de Paredes, con 120 hectáreas; e o de Vilardevós, na parroquia de Vilar de Cervos, con 900 hectáreas.
En Lugo está controlado o de Carballedo, na parroquia de A Cova, con 100 hectáreas queimadas.