Barbadás acolleu un obradoiro de autodefensa para mulleres organizado por valoReSC innovation
Un grupo de mulleres participou nun obradoiro de formación en habilidades persoais e autodefensa celebrado no Ximnasio Estudio A Valenzá, en Barbadás. A actividade foi organizada pola ONG valoReSC innovation no marco do programa A Tribo de Malala.
Este programa, apoiado pola Consellería de Política Social e Igualdade da Xunta de Galicia, está dirixido a mulleres en situación de vulnerabilidade e ten como obxectivo xeral ofrecer espazos de apoio mutuo, recursos e ferramentas que fomenten a súa autonomía e seguridade.
Durante a formación, as monitoras do club impartiron sesións prácticas centradas no uso de obxectos habituais como bolígrafos, chaves, pintalabios ou teléfonos móbiles como ferramentas de defensa persoal fronte a posibles agresións. Ademais, abordáronse pautas de comportamento e prevención orientadas a evitar situacións de risco.
Desde a organización destacan que o obxectivo principal é reforzar a confianza e a capacidade de autoprotección das participantes, fomentando tamén o autocontrol e a seguridade persoal.