Barbadás entregou os premios da oitava edición do concurso de petiscos ‘Barbadás a Bocados’
O salón de plenos do Concello de Barbadás foi escenario este martes da entrega de premios da oitava edición de Barbadás a Bocados, celebrada os días 12 e 13 de setembro. Durante esa fin de semana, os 11 locais participantes despacharon preto de 9.000 petiscos, unha cifra que confirma a boa acollida do certame.
O alcalde, Xosé Carlos Valcárcel, agradeceu o esforzo da hostalaría local e destacou que con esta iniciativa se pretende “reconocer y poner en valor el trabajo de todos los hostaleros y hosteleras, y resaltar a las nuevas gerencias que se animaron a participar”. Tamén a concelleira de Comercio, Marga Pérez, puxo en valor as boas sensacións transmitidas polos negocios e o ambiente festivo que acompañou o evento, ademais de agradecer a participación da veciñanza.
O certame contou con 670 votos do xurado popular, unha cifra superior a edicións anteriores. A proposta de A Cova do Savio, “Ma&Lu”, alzouse co primeiro premio nesta categoría, seguida do petisco “Tamari&Gay” de Ourenexpress.
Na valoración profesional, a cargo de tres docentes da Escola de Hostalaría e Turismo de Ourense, o primeiro posto foi para Wakanda co seu “Bocado wakandiano”. Ourenexpress volveu destacar co segundo premio profesional e co galardón á creatividade.
Os resultados oficiais poden consultarse no Centro Empresarial Transfronteirizo (CET). Os tres establecementos premiados recibiron ademais agasallos de empresas colaboradoras como Coren, Coto de Ousande e Fruta Legufrut, mentres que o xurado tamén foi recoñecido cun detalle do Concello.
Como é tradición, celebrouse un sorteo entre os votantes, no que se repartiron vales de 40 euros para gastar no comercio e na hostalaría de Barbadás.