Barbadás festexa a Semana do Libro con contacontos, xogos e obradoiros
O próximo luns arranca en Barbadás a Semana do Libro, cunha programación chea de actividades como xogos, contacontos, obradoiros e, por suposto, moitos libros.
O programa arrancará o luns, 21 de abril, cun contacontos na Biblioteca Municipal ás 10.30 horas, e continuará o día 22 con outros dous contacontos: un na libraría ESPA ás 18.30 horas e outro na libraría Valenzá ás 19.15 horas.
O día, 23, coincidindo coa celebración do Día do Libro, haberá xogos na Biblioteca Municipal para alumnado da Escola Infantil a partir das 10.30 horas, así como un contacontos na libraría Moraima ás 18.30 horas e outro ás 19.15 horas na Libraría Carlín. Ademais, durante a xornada, as librarías do municipio contarán cun 10% de desconto en compras de libros.
O día 24, a Biblioteca Municipal acollerá un obradoiro sobre Carmen Martín Gaite ás 17.30 horas, e o día 25 terá lugar a representación ‘Castelao. Un corazón á intemperie’ da compañía Fantoches Baj, ás 20.00 horas na Casa da Cultura Manuel María.