Cancelada a Feira de Arte de Allariz ‘Arte de Man’ prevista para este domingo
A organización da Feira de Arte de Allariz anunciou a cancelación do evento previsto para este domingo 7 de setembro. A decisión responde á previsión de choiva e condicións meteorolóxicas adversas, que impiden garantir tanto o correcto desenvolvemento da feira como o benestar de artistas, expositores e visitantes.
O mercado, coñecido como “Arte de Man”, íase celebrar na Zona de Santo Estevo do casco histórico de Allariz entre as 11:00 e as 20:00 horas. A iniciativa, xa consolidada no calendario cultural da vila, tiña como obxectivo reunir artesáns de toda Galicia e ofrecer aos visitantes a oportunidade de coñecer e adquirir pezas de cerámica, olaría, xoiería, téxtil e outras disciplinas creativas. Entre os participantes estaban confirmados Mamá Sara, Marta Cui, Xogo de Fíos, Enxógate, Imprime 3D, Estudo Aldea, Olería do Batán, Mor Talla, Magari Clay, Museo do Coiro, A.N.D.R.E.A., Moi de Flores, Luis Pachón, Artesanía Nómada, Paulinha D’Arzoa, Coco e Lobo, Paselopase, Merino Coqueta e Rosa Ana Soto.
Ademais da exposición e venda de pezas, o programa contemplaba actividades paralelas, como un obradoiro de creación con flores secas dirixido por Moi de Flores ás 12:00 horas, pensado para nenos a partir de 6 anos, e un espectáculo musical de Pirata Sen Parche pola tarde.