Carlos Babío inaugurará as Xornadas de Memoria Antifascista en Celanova cunha charla sobre o Pazo de Meirás
O investigador e presidente da Comisión pola Recuperación da Memoria Histórica da Coruña, Carlos Babío, abrirá este sábado, día 15, as Xornadas de Memoria Antifascista sobre A Transición Española, organizadas polo Comité de Memoria Histórica da Comarca de Celanova.
O acto terá lugar ás 11.45 horas no Salón de Arcos da Casa do Concello, onde Babío abordará a historia do Pazo de Meirás como símbolo da impunidade franquista desde a morte do ditador até ben entrado o século XXI.
Neto dunha das mulleres cuxa propiedade foi espoliada pola familia Franco durante as sucesivas ampliacións do pazo, Babío é coautor do ensaio Meirás, un pazo, un espolio, un caudillo, obra que serviu de base á demanda xudicial que permitiu ao Estado recuperar o inmoble e obrigar aos Franco a entregar a propiedade en decembro de 2020.
O investigador estará acompañado por Rubem Centeno, tamén membro da Comisión pola Recuperación da Memoria Histórica da Coruña, quen centrará a súa intervención no papel do Cárcere da Coruña como espazo de represión política durante os anos da Transición.