Catro deportistas do Club Marbel representan a Ourense na Supercopa de Castellón
Catro integrantes do Jiu Jitsu Club Marbel participan este sábado na Supercopa de Jiu Jitsu que se celebrará nas instalacións deportivas Chencho, en Castelló de la Plana. O torneo reunirá a competidores das categorías Infantil, Cadete e Júnior (sub-16, sub-18 e sub-21).
Na modalidade de Dúo, o equipo formado por Carla Seone e Beatriz Nesi, en categoría sub-16, competirá en Kata e Show. Ambas buscarán revalidar o ouro que lograron a comezos de mes no Open Infantil.
O club tamén contará con representantes nas probas individuais de Loita e Ne Waza. A internacional Leire Carrera Prieto participará en ambas modalidades na categoría feminina de -57 quilos, mentres que Rodrigo Álvarez Gómez, con experiencia a nivel estatal, faráo en -77 quilos masculina.
Os catro deportistas estarán acompañados no tatami polo mestre Felipe Iglesias, seleccionador galego e recente bicampión mundial de Dúo Kata Máster, e pola mestra Anita Fernández Moráis. O obxectivo marcado para o dúo e para Leire Carrera é loitar pola vitoria, mentres que no caso de Rodrigo Álvarez a prioridade será gañar experiencia e avaliar a súa progresión respecto á pasada tempada.