CCOO denuncia a precarización da seguridade do persoal de reparto de Correos Ourense
CCOO Ourense, sindicato maioritario en Correos, denuncia a intención da empresa postal pública de obrigar o persoal de reparto a pé a utilizar patinetes eléctricos cun carro incorporado. Este dispositivo, considerado legalmente como un vehículo de mobilidade persoal (VMP), debe circular pola calzada xunto co resto do tráfico rodado, o que advirten supón un risco significativo de accidentes graves e mesmo mortais para os traballadores.
O sindicato critica a decisión da empresa e dos seus directivos, aos que acusa de precarizar as condicións laborais e comprometer a seguridade do persoal. Ademais, sinalan que esta medida impónse ignorando o rexeitamento unánime de todas as organizacións sindicais presentes en Correos.
Dende CCOO lembran que ningunha empresa postal pública europea emprega VMP para as tarefas de reparto a pé debido á súa perigosidade e baixa eficacia. Os únicos usuarios destes vehículos, explican, son algúns repartidores de plataformas de riders, un colectivo que segundo lembra o sindicato, enfronta graves problemas de precariedade laboral. Advirten ademais que xa lograron paralizar un intento anterior de implantar estes vehículos en Correos durante a presidencia de Juan Manuel Serrano, e lamentan que o actual presidente, Pedro Saura, decidise seguir adiante coa medida, “contra toda lóxica ignore os argumentos preventivos e de seguridade para impoñer o seu uso, buscando publicitar unha falsa imaxe de modernidade”.
Ademais, CCOO denuncia que a empresa non compensará aos traballadores co complemento de perigosidade que si reciben aqueles que utilizan motocicletas ou vehículos de catro rodas para o reparto. Actualmente, Correos conta con case 14.000 vehículos de dúas e catro rodas, a maioría ecolóxicos e deseñados para circular con seguridade pola calzada. En contraste, o “carro asistido” híbrido que se pretende implantar engade un carro sobrecargado ao patinete, dificultando o seu manexo e aumentando o perigo.
As cifras, sinalan, avalan esta preocupación, xa que en España, os accidentes con VMP que causan danos aos seus condutores aumentaron un 23 % o ano pasado, con 396 sinistros, 240 feridos e 14 falecidos. Ademais, desde 2020, este tipo de accidentes creceu máis dun 400 %, superando mesmo aos de ciclomotores.
Ante esta situación, CCOO esixe á dirección de Correos a paralización inmediata da implantación destes vehículos e o abandono definitivo da idea. O sindicato advirte que, no caso de producirse algún accidente grave, denunciará penalmente a quen impulsase esta medida.