Celanova conmemorou o Día da Muller cun roteiro para poñer en valor o papel das mestras ao longo da historia
As asociacións de Amas de Casa “Ilduara” e de Mulleres Rurais “San Rosendo” organizaron este venres 7 de marzo, unha ruta guiada baixo o lema "Celanova: Terra de Mestras", enmarcada na celebración do Día da Muller Traballadora. A actividade estivo dirixida pola Fundación Curros Enríquez e percorreu distintos centros educativos da vila para poñer en valor o papel do ensino e das mestras ao longo da historia.
O itinerario comezou no CPR Sagrado Corazón, onde se explicou o labor da comunidade de franciscanas, que en 1897 fundou unha Escola de Nenas que chegou a contar cun internado. Na actualidade, o centro é plurilingüe e ofrece ensino desde educación infantil ata secundaria.
A continuación, a ruta dirixiuse ao IES Celanova Celso Emilio Ferreiro, situado no Mosteiro de San Salvador de Celanova, un espazo que ao longo dos séculos acolleu distintas iniciativas educativas, como as Escolas Pías, a escola de nenas e centros xestionados polos Agostiños e Salesianos. Tamén se lembrou o período no que acolleu o proxecto do Padre Silva, coñecido como a Cidade dos Rapaces.
O percorrido continuou ata o CEIP Curros Enríquez, que en 2025 cumpre 50 anos desde a súa apertura. Alí, docentes do centro explicaron a historia do colexio e a súa evolución ao longo do tempo. Durante o traxecto, lembráronse outros espazos que funcionaron como centros educativos na vila, como a Academia de Manuel Gago ou a escola primaria que ocupou o actual edificio dos xulgados no século XX.
A ruta finalizou na Casa dos Poetas, onde os asistentes puideron visitar a exposición do escultor Eduardo Rodríguez Osorio, con especial atención á sala dedicada ás maternidades.