Celanova porá fin este sábado ás Xornadas de Memoria Antifascista sobre a Transición Española cunha cita dobre

A Casa dos Poetas acollerá a presentación da obra colectiva ‘A Transición en Galiza’, seguida dunha mesa redonda baixo o título ‘A Transición en Ourense’

Imaxe dunha actividade das Xornadas de Memoria Antifascista sobre a Transición Española en Celanova

Celanova pecha este sábado as Xornadas de Memoria Antifascista sobre a Transición Española cun programa dobre na Casa dos Poetas, que arrancará ás 11:45 horas presentarase o libro colectivo ‘A Transición en Galiza’ (Ed. Laiovento, 2023), unha compilación de catorce ensaios que analizan diferentes aspectos sociais e políticos dese período. A apertura estará a cargo da activista e catedrática Adela Figueroa Panisse, que tamén compartirá a súa experiencia nos movementos sociais da Transición, especialmente no ecoloxismo e na defensa dos dereitos lingüísticos.

Posteriormente, o investigador Francisco Xabier Redondo abordará a represión ideolóxica e xudicial en Galicia entre 1964 e 1976, centrando a atención no papel do Tribunal de Orde Pública (TOP) durante o tardofranquismo.

Xa pola tarde, ás 16:30 horas, terá lugar unha mesa redonda titulada ‘A Transición en Ourense’, moderada por Moncho Boán e na que participarán catro figuras destacadas da loita antifranquista na provincia: Dolores Alonso Reverter, Nemesio Barxa, Manuel Peña-Rey e Alfredo Suárez Canal. Cada un deles aportará a súa visión desde diferentes militancias comunistas e nacionalistas.

As xornadas están organizadas polo Comité de Memoria Histórica da Comarca de Celanova e contan coa colaboración do Concello de Celanova e a Fundación Curros Enríquez.