Chega a primeira edición de “Ourense Territorio Emprendedor”, un evento para impulsar o desenvolvemento local e o talento no rural
Expourense acolleu este martes a presentación oficial de “Ourense Territorio Emprendedor”, unha iniciativa impulsada por AEPA e o Club do Emprendemento que aspira a situar a provincia como referente estatal en proxectos vinculados ao desenvolvemento rural e á actividade empresarial.
Na comparecencia participaron representantes institucionais e do eido económico, entre eles Marta Vázquez, directora territorial da Consellería de Emprego, Comercio e Emigración; David Martínez, presidente de AEPA; Rogelio Martínez, xerente de Expourense; José María de la Torre, director de proxectos do Club do Emprendemento; e Darío Palomo Alcaraz, xerente de Negocios de ABANCA en Ourense. Todos coincidiron na necesidade de reforzar o ecosistema emprendedor da provincia e no potencial que ofrece o territorio para impulsar novos proxectos.
A pesar de ser a súa primeira edición, sinalan os organizadores, o encontro espertou un notable interese: 20 emprendedores de fóra de Galicia, xunto con 28 ourensáns e 10 procedentes doutras zonas da comunidade, xa confirmaron a súa participación. Para a organización, estas cifras amosan o crecente atractivo de Ourense como lugar no que emprender e desenvolver unha traxectoria profesional.
O congreso celebrarase os días 5 e 6 de decembro e reunirá en Ourense a expertos, representantes institucionais e persoas emprendedoras para analizar os desafíos actuais do emprendemento, especialmente no ámbito rural. A sesión matinal do venres, aberta ao público, terá lugar en Expourense, mentres que as actividades da tarde e toda a programación do sábado —estas últimas na sede da Confederación Empresarial de Ourense (CEO)— estarán dirixidas exclusivamente a persoas emprendedoras e requirirán inscrición previa a través da web de AEPA.
A inauguración oficial comezará o venres ás 9:30 horas. Está prevista a participación de Luis Menor, presidente da Deputación de Ourense; Pablo Fernández, secretario xeral de Emprego e Relacións Laborais da Xunta; José María de la Torre; David Martínez; e Rubén Saavedra, director territorial de ABANCA en Ourense.
O experto en emprendemento Fernando Salinero abrirá o programa cunha charla motivacional, seguida da ponencia “A situación actual dos autónomos”, a cargo de José Luis Perea, secretario xeral de ATA.
Salinero moderará tamén a mesa redonda “Caso práctico: o reto do rural e a oportunidade para un emprendedor en Ourense”, na que participarán Marta Nóvoa (San Cibrao das Viñas), José Miguel Pérez (San Xoán de Río), Plácido Álvarez (Muíños), Francisco Magide (exalcalde de Parada do Sil) e César Fernández (Ribadavia).
O bloque dedicado aos recursos para novos proxectos incluirá as intervencións de Darío Palomo (ABANCA), que detallará as opcións de financiamento; María Dolores Álvarez (Sofmatic Consultores), que abordará cuestións de dixitalización; e Emma González, xerente do INORDE, que explicará as ferramentas de impulso provincial. A parte institucional pechará coa intervención de Miguel Ángel Santalices, presidente do Parlamento de Galicia.
Pola tarde desenvolveranse tres obradoiros prácticos centrados na sustentabilidade, o márketing dixital e a planificación financeira, impartidos por José María de la Torre, Pablo Sanmartín e David Martínez, respectivamente.
A programación do sábado continuará na CEO con sesións formativas sobre intelixencia artificial aplicada ao emprendemento, a Silver Economy e a importancia de emprender coidando a saúde. A xornada concluirá cun exercicio de traballo en equipo, un xogo dinámico de habilidades emprendedoras e unha visita guiada pola cidade.
“Ourense Territorio Emprendedor” aspira a consolidarse como un espazo clave para fortalecer o tecido empresarial local e poñer en valor as oportunidades do medio rural. Todas as actividades enmárcanse no programa INCIBE Emprende, financiado pola Unión Europea a través do PRTR e dos fondos NextGenerationEU, grazas ao convenio entre o Club do Emprendemento e o INCIBE.