Cinco deportistas do Marbel representan a Ourense na Supercopa de Jiu Jitsu Comunidad de Madrid
Este domingo, o pavillón Francisco Valcárcel de Villaviciosa de Odón (Madrid) acollerá a Supercopa de Jiu Jitsu Comunidad de Madrid en categoría absoluta, coa participación de cinco deportistas do Jiu Jitsu Club Marbel.
Nas modalidades de Dúo Kata e Dúo Show, a parella júnior formada por Lucía Caneiro e Silvia Iglesias fará o seu debut na máxima categoría, coa intención de medir o seu nivel fronte aos mellores competidores do país.
Ademais, o club ourensán estará representado nas competicións individuais de Loita ou Ne Waza (loita no chan). Os internacionais Leire Carrera e Rubén Córdoba competirán nas categorías de -57 quilos feminino e -94 quilos masculino, respectivamente. Tamén participará Yago-Nguyen Rodríguez na categoría de Loita -85 quilos.
O equipo do Marbel estará dirixido no tatami polos Mestres Felipe Iglesias, seleccionador galego e recente bicampión mundial de Dúo Kata Máster, e Anita Fernández Moráis. O obxectivo do equipo é competir a un alto nivel e aspirar a subir ao podio na maioría das categorías.