Cinco grandes incendios seguen activos en Ourense tras máis de dez días
Ourense continúa loitando contra os incendios forestais, con varios focos que levan máis dunha semana arrasando miles de hectáreas e convertendo esta vaga de lumes nunha das máis graves da historia recente de Galicia.
O incendio máis extenso continúa a ser o de Larouco, na parroquia de Seadur, declarado o mércores 13 de agosto. As últimas estimacións provisionais apuntan a que xa superou as 30.000 hectáreas queimadas, unha cifra histórica en Galicia. O lume esténdese tamén por Quiroga, O Barco de Valdeorras, O Bolo, Carballeda de Valdeorras, A Rúa, Petín, Rubiá, A Veiga e Vilamartín de Valdeorras. Para combatelo mobilizáronse centos de efectivos, entre eles a Unidade Militar de Emerxencias (UME).
Tamén preocupa especialmente o incendio que une os focos de Chandrexa de Queixa (Requeixo e Parafita) e Vilariño de Conso (Mormentelos). Iniciado entre os días 8 e 14 de agosto, acabou por converterse nun único gran fronte que afecta xa arredor de 19.000 hectáreas. O lume esténdese tamén a Manzaneda, Montederramo, A Pobra de Trives, O Bolo e Laza. Neste operativo traballan máis de 150 axentes, 180 brigadas e unha importante dotación de medios aéreos.
Outro dos grandes focos é o que comezou o 12 de agosto en Oímbra, na parroquia da Granxa, e que se uniu co rexistrado días antes en Xinzo de Limia, en Gudín. Entre ambos suman unhas 17.000 hectáreas calcinadas, que se reparten tamén por Monterrei, Cualedro, Verín, Laza, Trasmiras, Castrelo do Val e Baltar. Tamén neste caso se despregou a UME, xunto con máis de 180 brigadas e 30 aeronaves.
Pola súa conta, o incendio declarado na parroquia da Esculqueira, en A Mezquita, que leva activo desde o día 12, afecta xa arredor de 10.000 hectáreas. O lume esténdese aos concellos da Gudiña e Viana do Bolo e chegou mesmo á provincia de Zamora. Neste operativo colaboran tamén medios portugueses.
O quinto gran foco corresponde ao incendio de Carballeda de Valdeorras, na parroquia de Casaio, declarado o luns 11. Procedente de Castela e León, xa queimou unhas 2.600 hectáreas e ameaza espazos de alto valor ecolóxico, como o Teixadal de Casaio, un dos bosques máis antigos de Galicia, situado na contorna da Pena Trevinca.
Xunto a estes lumes activos, a provincia conta con varios incendios que puideron ser estabilizados nos últimos días, entre eles os de Carballeda de Avia e Beade (4.000 hectáreas), Maceda (3.500 hectáreas), Vilardevós-Moialde (600 hectáreas), Vilardevós-Vilar de Cervos (900 hectáreas), Vilardevós-Fumaces e A Trepa (100 hectáreas), Riós-Trasestrada (20 hectáreas) e Montederramo-Paredes (120 hectáreas).
A magnitude desta vaga de incendios é tal que, en apenas dúas semanas, Ourense rexistrou os tres maiores lumes documentados na historia de Galicia, superando con creces o do Courel en 2022, que arrasara 11.500 hectáreas.
Ademais estes datos hai que sumar os dous focos xa extinguidos, como o de Rante, en San Cibrao das Viñas, cun balance final de 40 hectáreas arrasadas, ou o de Seixalbo, extinguido o pasado 15 de agosto, que afectou unha superficie de 107,79 hectáreas.