Coles comeza este sábado co programa de actividades polo 8M
O Concello de Coles comeza este sábado o programa de actividades organizado con motivo do 8 de marzo, Día Internacional da Muller. A iniciativa inclúe propostas culturais, formativas e de lecer ao longo de todo o mes.
A programación arrincará esta tarde, ás 16:30 horas, cun acto conmemorativo organizado por A Casiña Artesanal no Salón de Plenos, mentres que o domingo, 8 de marzo terá lugar un concerto das Pandereteiras “Charamusgas”, ás 18:30 horas no Auditorio.
As actividades continuarán o 14 de marzo cunha cata de viños baixo o título “Entre Mulleres”, prevista para as 18:30 horas no Reitoral de San Eusebio. O 26 de marzo desenvolverase o taller de saúde mental “O que teño e o que me sostén”, tamén ás 18:30 horas.
Por ultimo, o 28 de marzo pola mañá, ás 10:30 horas, un roteiro silvestre centrado na identificación de plantas medicinais e comestibles e, pola tarde, ás 16:30 horas no Pavillón, o taller “Mindfulness e sonoterapia”.