Coles entregou os premios do III Certame “Letras contra a violencia” ao alumnado do CPI Antonio Failde
Este xoves tivo lugar no CPI Antonio Failde de Cambedo a entrega de premios do III Certame “Letras contra a violencia”, unha iniciativa promovida polo Concello de Coles que busca promover o compromiso da mocidade contra a violencia machista a través da palabra escrita.
O alumnado participante presentou relatos que reflexionan e denuncian esta lacra social, demostrando que as letras poden ser unha ferramenta poderosa para transformar realidades a través de historias cheas de sensibilidade que o Concello quixo recoñecer e poñer en valor.
Desde o Concello de Coles felicitan ás persoas gañadoras e a todo o alumnado que tomou parte no certame, destacando o talento, a creatividade e a conciencia social amosados. A actividade, explican, é unha mostra máis do papel fundamental da educación na construción da igualdade.