Comeza a campaña de recollida de alimentos de Nadal en Esgos
A Agrupación de Voluntarios de Protección Civil de Esgos únese un ano máis á campaña de recollida de alimentos non perecedeiros “Por un Nadal Feliz para tod@s”, organizada polo Voluntariado de Protección Civil en Ourense a favor do Banco de Alimentos de Ourense.
Durante varios días, os voluntarios percorreron distintas localidades do municipio para recoller alimentos. O calendario de recollida pasou xa por Pardeconde, Os Pensos, Xaravedra, Fondodevila, Casanova, Melón de Abaixo, Melón de Arriba, Quinta do Monte, Cernada, Arco, Touza, Meiroás, Guimarás, Alto do Couso, Feirobal, A Meiroá, Calsomiro, Cachamuiña, A Lama, Regueiro, Soutelo, Quinta e Parrocha.
Este venres, os voluntarios desprazaranse a Gomariz, Lobaces e Vilar de Ordelles. A vindeira semana, o martes 9, será a quenda de Tarreirigo, Lampazas, A Granxa, Rebordiños, As Campinas, Laioso, Pinto e Achas, e o mércores 10 a recollida será en Porta do Sol, As Vendas, Folgoso e Cabalgada.
Ademais, quen o desexe pode colaborar deixando as súas aportacións nos puntos de recollida situados no Concello, na biblioteca e no supermercado de Esgos.