Comeza en Allariz unha nova edición da Festa do Boi
Allariz prepárase este sábado para revivir unha nova edición da Festa do Boi, que se celebrará ata o 22 de xuño de 2025. Esta festividade, cunha fonda raíz histórica e cultural, está xa ben consolidada como un dos eventos máis emblemáticos de Galicia.
A programación deste ano conta cunha ampla variedade de actividades que combinan historia, tradición e lecer. Durante nove días, Allariz converterase no epicentro da festa con pasarrúas, teatro, música, xantares populares e, por suposto, as emocionantes saídas do boi, que percorren as rúas do centro histórico.
O programa da Festa do Boi de 2025 dará comezo este mesmo sábado cun gran Xantar Popular en Paicordeiro, un punto de encontro clave para a veciñanza e os visitantes, onde se poderá compartir mesa e celebrar o inicio desta gran festividade. Tras este xantar, terá lugar a tradicional Recreación do Trato do Boi en Roimelo, seguida da esperada baixada dos bois ata a Barreira. O domingo 15, a Procesión medieval do Xan de Arzúa transportará aos asistentes aos tempos da orixe desta festividade, cunha impresionante posta en escena.
Este ano o concurso de trobadores estará adicado a Xosé Manuel Piñeiro, Superpiñeiro convertendo esta actividade nun Supermedievo. Ademais, os máis pequenos poderán gozar de Saídas Infantís do Boi, que terán lugar en varias xornadas ao longo da semana.
A festa contará con destacadas actuacións musicais, como os Festicultores Troupe, a Orquestra Cinema, o Grupo Beatriz, ademais de pasarrúas coa charanga Sugarri e a treboada dos Zes Pereiras. O venres 20 de xuño, terá lugar outro dos momentos máis significativos: a Recreación da Bandeira, onde os gremios, acompañados de música tradicional, percorren a ata a Praza Maior para a colga da bandeira do Xan de Arzúa na Casa do Concello.
A alcaldesa de Allariz, Cristina Cid, resalta a gran importancia que ten esta festa para Allariz pero sobre todo para a veciñanza. Dende a súa recuperación, a Festa do Boi serve de vínculo interxeracional no que toda a veciñanza convive e participa activamente nas actividades durante eses nove días de festa. Cristina agradeceu a labor das persoas que colaboran na Asociación Cultural Xan de Arzúa e que fan posible que ano tras ano co seu traballo desinteresado organicen a Festa do Boi con meses de antelación.
Desde a organización, faise un chamamento á responsabilidade e ao respecto polos bois, recordando que o seu coidado está exclusivamente en mans das persoas encargadas da súa guía. Ademais, recoméndase ao público estar atentos durante as saídas do boi e evitar obstaculizar os portais, que serven como vía de escape en caso necesario.