Comezan as obras da futura pasarela peonil na OU-150 en Cudeiro
O delegado territorial da Xunta en Ourense, Manuel Pardo, desprazouse esta mañá ao núcleo de Cudeiro, no concello de Ourense, para comprobar o inicio das obras dunha pasarela peonil na estrada OU-150. A actuación, impulsada pola Consellería de Vivenda e Planificación de Infraestruturas, supón un investimento superior aos 435.000 euros.
Segundo explicou Pardo, a nova infraestrutura situarase na contorna do quilómetro 1 da vía, nun punto onde a ponte existente presenta un estreitamento. O obxectivo é mellorar a seguridade dos peóns, habilitando un paso independente ao tráfico rodado.
O delegado destacou que esta obra forma parte do Plan de Sendas da Xunta, coa que xa se teñen executado ou planificado uns 300 quilómetros de itinerarios peonís e ciclistas. Subliñou tamén que o Goberno galego continúa ampliando esta rede con criterios de integración paisaxística e respecto pola contorna. Lembrou ademais que os Orzamentos de 2026 inclúen 263 millóns de euros para novas actuacións en materia de mobilidade e conservación viaria, entre elas 71,6 millóns destinados ao mantemento da rede autonómica.
A pasarela proxectada será unha estrutura metálica tipo pórtico, con canto variable. Terá dous vans de 35,35 e 18,85 metros, cunha lonxitude total de 54,20 metros e un ancho útil para o paso de peóns de 2,50 metros. O taboleiro estará formado por unha celosía de tubos de aceiro.
O deseño contempla dous estribos protegidos con muros de 20 centímetros de espesor e muros de acompañamento para conter as terras dos accesos. A pila central combinará un pedestal de formigón e unha estrutura superior metálica que se ramificará en catro soportes.