Completados os traballos de mellora do alumeado entre Monterrei e o Parque Tecnolóxico e entre Castadón e O Ceboliño
A Xunta de Galicia e o Concello do Pereiro de Aguiar executan un proxecto conxunto de mellora da seguridade viaria nas estradas OU-536 e OU-537, vías de elevada circulación que conectan puntos estratéxicos como Castadón, a contorna de Monterrei e o Parque Tecnolóxico. A actuación está apoiada nun convenio de colaboración entre ambas administracións.
O alcalde do Pereiro de Aguiar, Luis Menor, explicou que o investimento total supera os 230.000 euros, repartidos en dúas anualidades. A primeira fase, correspondente ao exercicio actual, inclúe o inicio das obras centradas na mellora dos servizos á cidadanía. A segunda fase, prevista para o vindeiro ano, permitirá completar a iluminación da senda peonil da C-537, un tramo de uso frecuente por parte da veciñanza.
O proxecto reforza a conexión entre Monterrei e o Parque Tecnolóxico, unha área de intensa actividade industrial e comercial que empregan diariamente residentes do Pereiro de Aguiar e do concello veciño de San Cibrao das Viñas. O obxectivo prioritario é aumentar a seguridade tanto para o tráfico rodado como para os peóns que utilizan estas vías.
“Continuamos mellorando os servizos á cidadanía e a seguridade dos veciños e usuarios”, sinalou Menor, quen destacou tamén a colaboración da Xunta como elemento esencial para avanzar nestas melloras.