Confeti, globos e batucada para recibir ao Grand Prix en Celanova
Centos de veciños e veciñas de Celanova déronse cita esta tarde na Praza Maior para recibir a furgoneta do Grand Prix. Desde as 18.00 horas, Celanova agardaba baixo o sol a tan esperada gravación do vídeo promocional do programa por excelencia do verán.
Ao ritmo da música, con globos e cunha batucada a cargo de Vilatuka, o equipo da RTVE foi recibido con gran emoción entre os veciños e veciñas desta vila ourensá, que este ano representará a Galicia no Grand Prix, onde competirá contra os veciños de Cubas de la Sagra (Madrid), Alagón (Zaragoza), Huelma (Xaén), L’Ollería (Valencia), L’Arboç (Tarragona), San Sebastián de la Gomera (illa da Gomera – Tenerife), Urduliz (Bizkaia), Peñaranda de Bracamonte (Salamanca) e Herencia (Cidade Real). Un total de 10 pobos veranse as caras na edición de 2025 para alzarse co ansiado premio.
A gravación desta tarde daba oficialmente o pistoletazo de saída ao concurso para os celanoveses e celanovesas cun dos momentos máis agardados da xornada: o anuncio oficial do alcalde. “Veciños e veciñas”, berraba Antonio Puga desde o balcón, “¡imos ao Grand Prix!”.