David Martínez Alonso asume a presidencia da CEO
David Martínez Alonso foi elixido este xoves novo presidente da Confederación Empresarial de Ourense (CEO) tras a celebración da asemblea electoral da entidade, na que obtivo 148 votos dos compromisarios presentes e das delegacións participantes. A cita reuniu os 289 membros do censo con dereito a voto no salón de actos da sede de Afundación, en Ourense.
Martínez Alonso, ata agora tesoureiro da CEO e presidente da Asociación Empresarial de Profesionais e Autónomos de Ourense desde 2017, encabezaba a única candidatura presentada. Coa súa elección, ábrese unha nova etapa á fronte da organización empresarial provincial.
Durante a asemblea, César Blanco despediuse da presidencia agradecendo o apoio recibido ao longo do seu mandato, que definiu como “un honor e unha responsabilidade” asumida con plena dedicación. O presidente saínte lembrou os momentos complexos vividos pola organización, especialmente tras o falecemento de Marisol Nóvoa, e destacou que o seu principal obxectivo foi garantir unha transición ordenada. Nese sentido, afirmou que se entrega “unha organización estable, cohesionada, con rumbo claro e cunha candidatura excelente”.
Blanco tamén sinalou algúns dos retos pendentes, como preservar o legado de Marisol Nóvoa, impulsar que Expourense leve o seu nome e recuperar a Cámara de Comercio como ferramenta estratéxica para a internacionalización empresarial. Así mesmo, puxo en valor o traballo do equipo técnico, subliñando que “a CEO funciona porque eles funcionan”, e defendeu un maior recoñecemento ao seu labor. Pechou a súa intervención desexando éxito ao novo equipo e destacando que Ourense “é un lugar extraordinario para ter empresas, pola súa calidade de vida, a súa contorna e, sobre todo, pola súa xente”.
Na súa primeira intervención como presidente, David Martínez dirixiuse especialmente ás persoas asociadas, ás que definiu como a base fundamental da organización. Recalcou a necesidade de que a CEO sexa máis útil, próxima e eficaz, e defendeu unha maior presenza no día a día de empresas e asociacións. Segundo indicou, a confederación só terá sentido se representa “con firmeza e eficacia” a quen a integra.
O novo presidente reclamou ademais que Ourense avance “a outra velocidade” e puxo o acento na necesidade de mellorar as infraestruturas. Defendeu a importancia de contar con conexións ferroviarias competitivas, unha rede viaria moderna, solo industrial suficiente e telecomunicacións axeitadas, asegurando que estas demandas se trasladarán ás administracións “con rigor, unidade e determinación”. Neste contexto, advertiu de que “sen infraestruturas non hai competitividade, e sen competitividade non hai futuro”.
Martínez tamén abordou outros desafíos do tecido empresarial ourensán, como a falta de man de obra cualificada, o absentismo laboral e o apoio a sectores como o comercio e os autónomos, aos que cualificou como “un piar esencial do tecido económico”. Defendeu unha formación máis aliñada coa realidade empresarial para atraer e reter talento e alertou de que o absentismo “compromete seriamente a produtividade”, co obxectivo final de construír “unha CEO máis forte, máis unida e máis moderna”.
O peche da asemblea correu a cargo de Lorenzo Amor, presidente da Asociación de Traballadores Autónomos (ATA) e vicepresidente da CEOE, quen destacou que David Martínez asume agora a responsabilidade de trasladar a voz do empresariado a todos os ámbitos de decisión en Ourense. Amor asegurou o apoio de ATA nesta labor e subliñou a necesidade de reducir cargas, trámites e impostos “para impulsar o emprendemento e consolidar os negocios dos autónomos e empresarios de Ourense”.
Así mesmo, advertiu da delicada situación do tecido produtivo, apoiándose nos últimos datos da Enquisa de Poboación Activa, e alertou de que “a burocracia, as regulacións, a inseguridade xurídica, as cargas administrativas, os impostos, as cotizacións e o incremento dos custos laborais están a afundir aos empregadores que teñen menos de cinco traballadores”, sinalando que sen este tecido empresarial “os municipios morren”.