Decenas de persoas achegáronse ao Castro de Trelle para coñecer os resultados da campaña arqueolóxica de 2025
O pasado sábado 10 de xaneiro, o Castro de Trelle acolleu unha visita guiada para presentar os resultados da Campaña Arqueolóxica do 2025. A actividade contou cunha ampla participación de visitantes, comuneiros e veciños da bisbarra interesados en coñecer o xacemento.
A campaña, a segunda neste espazo de gran valor patrimonial, foi realizada por Breogán Arqueoloxía e Árbore Arqueoloxía e Restauración S. Coop. Galega, promovida polos concellos de Toén e Barbadás e financiada pola Consellería de Cultura da Xunta de Galicia.
Tras a campaña anterior, nesta segunda fase fixéronse visibles algúns dos resultados destes imprescindibles e valiosos traballos de recuperación e restauración, ao abeiro do Plan de actuacións arqueolóxicas de 2025. Os traballos consistiron nunha escavación arqueolóxica nunha área de aproximadamente 80 m², que continuou os sondeos realizados en 2024 (45 m² en Toén e 35 m² en Barbadás).
Unha vez finalizada a escavación, procedeuuse ao tapado provisional cun elemento diferenciador e terra do propio vertedoiro, mentres se espera definir unha actuación de consolidación e restauración, que dependerá dos resultados e do estado de conservación dos restos. Para iso, no seu momento deseñarase un proxecto específico de intervención.
O obxectivo principal desta actuación é profundar na caracterización do ben, ampliar o coñecemento científico e facilitar información relevante para planificar con maior eficacia futuras escavacións e traballos de valorización.
Durante a visita, os arqueólogos Andrés Rodríguez (Breogán Arqueoloxía), Nerea Vilariño e Darío Peña (Árbore Arqueoloxía e Restauración) xunto co historiador Pablo Sabucedo, de Amigos do Patrimonio de Toén, explicaron os principais achados da campaña. Ademais, a cita contou coa presenza dos alcaldes de Toén, Ricardo González, e de Barbadás, Xosé Carlos Valcárcel.
Desde Amigos do Patrimonio agradecen a participación de todas as persoas que asistiron, destacando o interese que suscita a arqueoloxía na sociedade e na veciñanza da zona.