Declarado un novo incendio en Ourense, no concello de Avión
A provincia de Ourense, onde continúa activa a Situación 2, rexistrou un novo incendio forestal este domingo no concello de Avión, concretamente na parroquia de Nieva. Con este último foco xa son tres os lumes que seguen activos en Galicia nesta vaga de incendios que leva máis de dúas semanas castigando a Galicia, todos eles situados en territorio ourensán.
Segundo os datos achegados pola Consellería do Medio Rural, o incendio de Avión comezou arredor das 17.09 horas deste domingo e afecta xa a unhas 70 hectáreas.
Por outra banda, permanecen activos os de Chandrexa de Queixa e Vilariño, cunha superficie arrasada de 19.000 hectáreas e evolución favorable, e o de Carballeda de Valdeorras, na parroquia de Casaio, que xa alcanza as 4.400 hectáreas.
Xunto a estes, foron declarados estabilizados outros focos: o de Larouco, na parroquia de Seadur, con 30.000 hectáreas queimadas (e que afectou a Quiroga, en Lugo, onde se quemaron 9.000 hectáreas); o de Oímbra e Xinzo de Limia, en A Granxa e Gudín, con 17.000 hectáreas; o da Mezquita, en A Esculqueira, con 10.000 hectáreas; o de Carballeda de Avia e Beade, con 4.000 hectáreas; o de Vilardevós, en Vilar de Cervos, con 900 hectáreas; e o de Vilaboa, en Santa Cristina de Cobres, con 70 hectáreas.
Na tarde deste domingo, arredor das 15.56 horas, quedou controlado o lume que afectaba ao concello de Riós, nas parroquias de Fumaces e Trepa, cun balance de 100 hectáreas queimadas.
Tamén se atopan controlados os incendios de Maceda, nas parroquias de Santiso e Castro de Escuadro, con 3.500 hectáreas; o de Vilardevós, en Moialde, con 600 hectáreas; o de Montederramo, en Paredes, con 120 hectáreas; o de Riós, en Trasestrada, con 40 hectáreas; e o de Carballedo, na parroquia de A Cova, con 100 hectáreas.