Eladio Santos salienta o apoio do Goberno á saúde visual infantil con máis de 1.100 beneficiarios do Plan VEO en Ourense
O subdelegado do Goberno en Ourense, Eladio Santos, subliñou hoxe en Celanova o compromiso do Goberno de España coa saúde visual da infancia durante unha visita á Óptica Anteollos, onde os seus xerentes, Rubén Santalices e Catuxa Rivas, confirmaron o éxito do Plan VEO na provincia.
“O Goberno ponse unha vez máis ao carón das familias co financiamento dun gasto esencial, como son as lentes para ver ben, e que supón un esforzo económico para moitas persoas”, afirmou Santos, lembrando que este programa do Ministerio de Sanidade financia sistemas de axuda visual de ata 100 euros ao ano para nenos e nenas de ata 16 anos.
O subdelegado indicou que en Ourense xa hai máis de 1.100 beneficiarios e 51 ópticas adheridas ao Plan VEO. Ademais, Galicia lidera o acceso a esta iniciativa en España, con 271 solicitantes por cada 10.000 menores de 16 anos, o que supón máis de 9.500 nenos e nenas galegos beneficiados.
Santos animou ás familias da provincia a aproveitar estas axudas, dotadas cun orzamento de 48 millóns de euros, que se poden solicitar en ópticas participantes ata o 31 de decembro de 2026. “Este plan tamén pretende incentivar a compra en ópticas físicas nas vilas e cidades, axudando unha vez máis ao comercio de proximidade”, engadiu.
Durante a visita, o subdelegado agradeceu a implicación de Rubén Santalices e Catuxa Rivas na difusión e prestación do programa, que se implementa en colaboración co Consello Xeral de Colexios de Ópticos-Optometristas. En Galicia participan 564 ópticas, dentro dun total de 7.464 establecementos en toda España.
O Plan VEO permite cubrir ata 100 euros por menor e ano, incluíndo monturas completas, cristais graduados con tratamento antirreflexo ou lentes de contacto, xunto coas solucións líquidas necesarias. Se o produto custa menos de 100 euros, a axuda cobre a totalidade; se supera ese importe, a familia só abona a diferenza. As solicitudes realízanse de forma presencial nunha óptica participante, que xestiona toda a documentación a través da aplicación web do programa.