En marcha a última fase dos traballos de rehabilitación do antigo colexio de Sobrado do Bispo
O Concello de Barbadás iniciou a colocación dunha solera ventilada no local social de Sobrado do Bispo, situado na rúa da Granxa. A actuación, valorada en preto de 30.000 euros, constitúe a segunda fase da intervención que transforma o edificio histórico, antiga escola da localidade, e eleva o investimento total municipal a máis de 180.000 euros.
“Con a instalación da solera se culmina a restauración integral e revitalización dun edificio singular que apenas se utilizaba ata agora”, sinala Victoria Morenza, tenente de alcalde e concelleira de Obras. A edil engade que a rehabilitación permitirá darlle un uso máis amplo ao espazo, que ata agora só servía como local electoral e de ensaio, ampliando a súa función educativa, social e cultural.
A primeira fase, rematada a finais de xullo, incluíu a renovación da cuberta, a substitución parcial da estrutura de soporte, o cambio das carpintarías, a instalación de illamento nas fachadas e a modernización da fontanería, saneamento, electricidade, iluminación e ventilación. Nesta etapa, o goberno local destinou 151.957 euros.
Victoria Morenza subliña a importancia desta rehabilitación para a vida veciñal, que permitirá que as asociacións culturais e comunitarias de Sobrado enchean de actividade un edificio tan emblemático, que data de 1920 segundo o catastro. “A ventilación será moderna, como a dun edificio de nova construción”, engade, resaltando que a segunda fase garante un sistema de aireación adecuado para o uso futuro do local.