Expertos en termalismo participan en Ourense nas 'I Xornadas sobre Termalismo: Auga, Saúde e Coñecemento'
O Centro Cultural Marcos Valcárcel de Ourense acolleu o 19 de marzo a primeira das xornadas das I Xornadas sobre Termalismo: Auga, Saúde e Coñecemento. Durante esta xornada, expertos de diversas disciplinas compartiron as súas investigacións e estudos sobre o potencial das augas termais, abrangando aspectos como o seu marco xurídico, as súas posibilidades turísticas e as súas aplicacións no ámbito da saúde, benestar e gastronomía.
Este evento foi organizado pola Escola Universitaria de Enfermaría de Ourense, centro vinculado á UVigo, coa colaboración do Campus Auga, un proxecto de especialización do campus de Ourense, acreditado pola Xunta de Galicia, que ten o termalismo como un dos seus principais eixes de traballo. O comité organizador das xornadas está composto polas profesoras Mª Reyes Pérez, Mª Milagros Fernández e Natalia Olida Fariñas. As actividades están dirixidas tanto a profesionais do sector do termalismo e da saúde como ao público en xeral.
A segunda xornada celebrarase o vindeiro 26 de marzo e contará coas seguintes intervencións. Herminia Domínguez, catedrática da Facultade de Ciencias do campus de Ourense, falará sobre os produtos para a pel elaborados con auga termal. Ademais, Sidonia Martínez e Miguel González, do Restaurante Miguel González, presentarán proxectos colaborativos sobre gastronomía, saúde e auga termal. Nesta segunda sesión tamén se abordarán temas como o uso das augas das Burgas no tratamento da dermatite atópica e a psoriase, a cargo de Cristina Barral, do Servizo de Atención Primaria de Vilanova (Pontevedra), e un proxecto de investigación sobre o baño termal como prevención de síntomas ansioso-depresivos en estudantes de Enfermaría, realizado por Lucía de Luis Cid, Clara Sobrino e E. Abigail González. Ao final da xornada, celebrarase unha mesa redonda para o intercambio de ideas.