Expourense volverá converterse no maior parque multiaventura de Galicia cunha nova edición de ‘Funtastik – No Limits’
Expourense acolleu esta mañá a presentación da segunda edición de Funtastik – No Limits, un evento que transformará o recinto feiral nun gran parque multiaventura con propostas educativas e de lecer para todas as idades.
A cita celebrarase do 3 ao 12 de outubro e conta co respaldo da Deputación Provincial de Ourense e da Xunta de Galicia, a través da Consellería de Educación, que permitirá a participación de escolares de máis de 40 centros da provincia. O proxecto mantén o seu compromiso cos Obxectivos de Desenvolvemento Sustentable, fomentando valores como “a sustentabilidade, o consumo responsable, a igualdade e a participación activa”.
No acto de presentación participaron o delegado territorial da Xunta en Ourense, Manuel Pardo; o director territorial de Educación, Jorge Rubén Sampedro; o vicepresidente da Deputación, César Fernández; o xerente de Mantesil e promotor da actividade, Berto Fernández Docampo; e o director xerente de Expourense, Rogelio Martínez.
Entre as novidades deste ano destacan o espazo “Mercar con sentido”, orientado ao comercio local e responsable, e a zona de orientación “Galicia Máxica”, que permitirá descubrir o territorio galego desde unha óptica lúdica e educativa. Tamén se incorporará o inchable “Extreme Run”, cun percorrido de 600 metros, xunto coa ampliación da gran gymkana inchable estreada en 2024. Ademais, habilitarase unha área específica para o público infantil.
A primeira edición, celebrada en outubro do ano pasado, reuniu no recinto a máis de 10.000 visitantes.