Finalizadas as obras de ampliación e mellora enerxética no IES Eduardo Blanco Amor de Ourense
O conselleiro de Educación, Ciencia, Universidades e Formación Profesional, Román Rodríguez, visitou este martes o IES Eduardo Blanco Amor de Ourense para comprobar o resultado das obras de ampliación e rehabilitación recentemente finalizadas neste centro educativo.
A intervención, centrada na mellora da eficiencia enerxética e na modernización das instalacións, permitiu ampliar o instituto en case 400 m² mediante a construción dun novo volume na planta alta. Esta ampliación incorpora tres novas aulas, un corredor central con espazos docentes a ambos lados e unha zona cuberta tipo soportal.
Ademais da ampliación, realizáronse diversas melloras estruturais: renovación de 700 m² de cuberta, substitución de 32 carpintarías, instalación de 126 luminarias LED e novas caldeiras. Tamén se reforzou o illamento térmico do edificio, coa aplicación de 157 m² de sistema SATE e 80 m² de fachada ventilada. No ámbito das enerxías renovables, incorporáronse tres baterías de sete captadores solares térmicos.
Os traballos completáronse con labores de pintura, reparacións xerais e o pulido do pavimento de terrazo existente. As obras comezaron no mes de xuño de 2024 e xa están rematadas.
Durante a súa visita, Román Rodríguez subliñou que “esta intervención tiña como obxectivo seguir mellorando as instalacións dun instituto exemplar no sistema educativo”.