Funergal pecha a súa 12ª edición con máis de 4.500 asistentes
Funergal pechou este domingo en Expourense as portas da súa 12ª edición tras dúas xornadas e media de intensa actividade comercial e formativa durante as que recibiu o apoio dos profesionais do sector.
En total, esta cita recibiu máis de 4.500 visitas, un 11% máis que na edición de 2022, superando todas as expectativas e consolidándose como aa cita de referencia do sector funerario en Galicia. Esta edición contou coa participación de 55 expositores de 8 países.
Esta edición de Funergal incluíu, ademais, o 3º Congreso Internacional de Directivos Funerarios que reuniu a 14 expertos e que contou cunha boa asistencia, xa que ao redor de 400 profesionais seguiron os relatorios do congreso.
Premios Funergal Internacional
Os Premios Funergal Internacional creáronse en 2012, para celebrar o gran salto cualitativo que deu esta cita ao ser recoñecida como feira internacional polo Goberno de España. Os premios deste ano recoñeceron, precisamente, os eixos sobre os que está a virar a evolución do sector funerario: tecnoloxía e sustentabilidade.
O Premio á Mellor Caseta (Infuner) foi para Invvovacións Funerarias, que tamén resultou gañadora da na edición anterior. O Premio á Mellor Acción Promocional recaeu na empresa Tellmebye, mentres que o Premio á Internacionalización foi para Minitrucks Robotics. Por último, o Premio ao Mellor Produto/Servizo Innovador foi para Aerodrop.
Esta 12ª edición estivo patrocinada pola Deputación Provincial de Ourense e tamén contou co patrocinio dos grandes grupos empresariais de prestación de servizos funerarios do país como Interfunerarias e Grupo Albia, a colaboración de Enalta.