Investigadores ourensáns crean unha ferramenta para definir mellores rutas nos aeroportos de drons
O grupo da Universidade de Vigo Aerolab (Aerospace & Transportation Systems Laboratory) traballa, no marco dun proxecto estatal, na creación dunha ferramenta computacional que, baseándose en datos xeoespaciais, meteorolóxicos e de simulación de fluídos, definirá as rutas máis seguras e eficientes para un vertiporto en cidade, é dicir, para un aeroporto de drons urbano, informan desde a UVigo.
O proxecto ten unha duración de dous anos e esta financiado con 121.000 euros pola convocatoria Proxectos de Xeración de Coñecemento, do Ministerio de Ciencia e Innovación, e o Fondo Europeo de Desenvolvemento Rexional-Next Generation EU.
“Os vertiportos achegarán un novo modelo de conectividade urbana”, sinalan as e os investigadores da UVigo. Neste contexto, o obxectivo xeral de Safe-Vertiport é “contribuír a garantir a seguridade e a eficiencia de manobras de aterraxe e despegue de aeronaves en emprazamentos de vertiportos urbanos”, sinalan desde a organización.