Invístense máis de 315.000 euros na mellora da OU-0517 entre Vilanova e Soutopenedo
A Deputación de Ourense está a executar o proxecto de mellora integral da estrada provincial OU-0517, no concello de San Cibrao das Viñas, no tramo comprendido entre Vilanova e Soutopenedo, obras nas que investirá máis de 315.000 euros.
Tras unha primeira fase xa rematada hai dous anos, na actualidade realízanse traballos de ensanche da estrada e de habilitación dun itinerario peonil que vai desde Vilanova de Rante ás instalacións deportivas en Soutopenedo (piscinas e campo de fútbol) e o entorno da Bouteira. Neste caso o investimento supera os 158.000 euros.
Aínda haberá unha terceira fase na que se rematará o ensanche da estrada entre ambas localidades e procederase ao estendido dunha capa de firme na totalidade do tramo de actuación. O orzamento previsto para esta última fase é de máis de 127.000 euros.