James Morrison, Baston Brass e Abraham Cupeiro estarán na A XI edición do Festival Hércules Brass
O director xeral de Cultura, Anxo M. Lorenzo, participou este mércores na presentación da XI edición do Festival Hércules Brass, onde salientou a contribución desta cita para “achegar a música de cámara e de vento-metal a todos os públicos a través dun programa cheo de artistas de alto nivel”. Neste senso, o representante da Consellería de Cultura, Lingua e Xuventude engadiu que a iniciativa, incluída na programación estival Para gustos, cultura promovida pola Xunta de Galicia para os meses de verán, é xa un “punto de encontro e referencia para os novos músicos deste xénero”.
Na presentación, o director xeral de Cultura destacou o compromiso do Goberno galego con este festival, unha cita que conta con máis dunha década de historia e que reunirá en Celanova a máis de 100 estudantes e a destacados profesionais do trombón, a trompa ou o bombardino chegados desde distintas partes e orquestras do mundo.
As diversas actividades do festival terán lugar do 28 de xullo ao 1 de agosto no claustro do Mosteiro de San Salvador de Celanova. A actuación que inaugurará a cita será a da Banda de Música de Celanova con James Morrison, un concerto único en España que terá lugar ás 20,30 horas. Ademais deste, subirán ao escenario a Boston Brass de Estados Unidos, Abraham Cupeiro coa Orquestra Gaos e pechará a edición o Hércules Brass Ensemble dirixido por Isabel Rubio e coa Boston Brass e Adam rapa como solistas.
Así, os concertos complementaranse con cinco días de actividades formativas para un centenar de estudantes procedentes de distintas comunidades autónomas. Clases de alto nivel da man dalgúns dos participantes nas actuacións e un seguimento continuo e individualizado que garante un acompañamento pedagóxico para o alumnado que xa leva participado en varias edicións consecutivas do festival.